釣點：藍塘海峽
魚餌：紅蟲、青蟲、蝦仁、沙蝦
人物：Kinane, 董伯伯, 莊生, 莫生,
艇家：阿福
9月19日凌晨瞓得唔係咁好，3點幾起咗身再瞓唔著，可能上次有幸運成份攞咗冠軍，而今次缺少高手 LEEKWOKCHUEN 在陣，所以壓力較大，如果取得季軍已有交代。
比賽當日天氣幾好，唔太熱，幾細風，對我嚟講最適合不過，因為我好受天氣影響，如果落雨或者大風就好似唔識釣魚一樣，實力大打折扣。
在岸邊觀察13隻艇之中有幾隻大頭艇並唔適合釣魚，似係平時用嚟載人多過釣魚，因為艇倉內的圍板好高，極之唔就手，要用櫈仔加高嚟坐，遇上大浪會好容易跌倒，當抽籤之前好想抽中1號亞喜隻艇，因為上屆就係靠亞喜奪冠，而且佢隻艇有廁所又特別大隻，非常老嚟。嚟到勝負最關鍵一刻喇，可惜抽中3號艇，心知不妙，要攞第一就難上加難，望真啲3號艇都唔差，可以話今年抽到中籤。
今年比賽釣點跟前幾屆有所不同，當所有賽艇由筲簊灣向東行，唔係慣常的維港，因為之前已經搞過幾次維港團，可以話有主場之利，改去石澳附近水域，由於我從未在這裡釣過，只是去担杆坐快艇經過，不知是禍是福。
3號艇在較後時間出發，但馬力較大，從後趕上，差不多第三隻艇到達釣點，一開波阿莫生就中條大魚，大叫攞撈簊，本能反應立即拍片，錄影精彩時刻，條魚一上水，比我想像中細，係全長37cm的三鬚，以為好嘅開始，就係成功嘅一半，自從呢個大撈簊出動過一次之後，都未用過咯，可想而知之後嘅魚獲又係魚毛嘅天下，今年蔬蘿特別多，其次係石狗公同埋扯旗鱲霸佔頭三位。呢個艇家有時車到有啲位好景，有啲位冇料到，我第一次嚟呢度釣魚所以唔敢出聲，其實全日爆釣時間喺就嚟回航時發生，當日下午三點幾艇家駛去垃圾灣，該處風平浪靜，水夠深，最緊要海底唔嚡，唔使成日扯斷絲又要綁釣組，啱晒我呢啲懶人，而且全艇人一放絲到底必中，通常釣到扯旗鱲，有時釣到沙鱲，可惜四點半要啟程回航，無奈要在不停起魚之中收絲結束今次比賽。
返到碼頭只是五點廿分，還有十分鐘剩，使唔使咁早收韁過終點呀，如果畀多十分鐘再爆多一斤並唔出奇，到時就定啲啦。到將魚獲過磅時間，眼見只有2號艇能夠跟3號艇一較高下，2號艇磅先，佢哋要分開兩次嚟磅，結果共有25磅幾，輪到我哋3號艇過磅，亦係分開兩盤嚟磅，當宣布3號艇共有24磅10安士得第二名時，只輸1磅覺得唔抵，冇晒心機。
9月20日晚放工返到屋企睇短片，發覺原來我哋總魚獲有30磅12安士，3號艇本應攞到冠軍，可惜主持人計錯數，誤將第二次過磅的重量14磅寫成7磅，當時我離開幾遠拍片，而且個磅又反光，所以我完全睇唔到有幾多磅，唯有信晒人，9月21日朝早用隻USB手指記載比賽當日的相和短片檔案交給釣魚比賽的搞手，作為證據，希望可以將名次更正，得出更公平公正的賽果，但到依家仍未收到任何消息。
回想如果當日有LEEKWOKCHUEN 做隊友，佢眉精眼企，應該在現場知道有冇出錯，就唔使事後拗數咁煩。
2010年9月28日上午知道名次不能更改，理由係當時點解唔指出錯誤，點解你哋班隊友唔睇住做計數的同事手上的紙張有冇寫錯，哈哈...... 經一事長一智，我又學識咗一樣嘢，原來每次過磅，無論哪一隊都要睇清楚有幾多磅，然後對吓做計數的同事的記錄有冇出錯，再計算總重量。
本來以為有短片做證據，名次係會更改的，只要遇著勇於承認錯誤的同事就可以，奈何我遇不到，今次釣魚比賽搞手的誠信不比素未謀面的網友高。
在足球場上有個荒謬現象：【球證嘅錯誤係比賽中嘅一部份】，【球證嘅判決就係最終的判決】，無論球證判錯幾多次都係至高無上，神聖不可侵犯的終極判決，就算有影片做證據亦視若無睹，竟然呢個荒謬現象在釣魚比賽也出現，今次不幸的事發生在我的隊伍身上，慘遭被屈﹗
我話畀大家知佢所謂正確 24磅10安士條數點樣計出嚟
第一次過磅 加 第二次過磅 加 發泡膠箱重量
17磅3安士 + 7磅 + 7安士 = 24磅10安士
事實擺在眼前條數係咁計出嚟
第一次過磅 加 第二次過磅 減 發泡膠箱重量
17磅3安士 + 14磅 - 7安士 = 30磅12安士
2號艇奪得冠軍總魚獲共有25磅幾，而3號艇得亞軍總共有30磅12安士魚獲，呢個係乜嘢嘅世界？
13隻大頭艇齊向藍塘海峽進發
出發短片：http://www.youtube.com/watch?v=gyMMxfe2OWM
差唔多成日都喺呢度附近釣魚
連續3年的好拍擋，Sakura キャスト桜黒潮 1.55M 小船竿，Shimano Biomaster C3000 直絞，不過3年比賽都釣唔到大魚，希望下年換套新釣具，爭奪大魚獎
阿莫生落第一口餌即中三鬚
三鬚短片：http://www.youtube.com/watch?v=dZfrqHIxZ7Y
呢度就係臨尾爆釣的食糊位喇
食粥食飯就睇吓呢箱魚有幾重
2號艇過磅短片：http://www.youtube.com/watch?v=2M3Q2U2ITeE
3號艇過磅短片：http://www.youtube.com/watch?v=7w60ZTrR6Pw
我就分咗呢啲魚孝敬父母，其實我唔想劏魚、煎魚同埋洗冰箱至真
